АҞӘА, ԥхынҷкәын 26 — Sputnik, Бадри Есиава. Аԥсны Аҭагылазаашьа ҷыдақәа рминистрра аԥшааратә гәыԥ иаҭахханы иҟазар иазыхиоуп урыстәылатәи арратә ҳаирплан ТУ-154 ахькаҳаз аҭыԥ ахь анеира. Абри атәы ҳкорреспондент иеиҳәеит АҶА аминистр Лев Кәыҵниа.
"Ҳара иааиԥмырҟьаӡакәа Урыстәыла Аҭагылазаашьа ҷыдақәа рминистрра аусзуҩцәа ҳаҽрымаадоит. Ҳзанаҭуаа азыхиоуп иахәҭаны иҟало аусқәа рымҩаԥгара. Уажәазы иазыԥхьагәаҳҭоит Гагра араион иахьаҵанакуа аусурақәа рымҩаԥгара", — иҳәеит Кәыҵниа.
Кәыҵниа иажәақәа рыла Аԥсны АҶА Урыстәылатәи рколлегацәа адашшыларатә шәҟәы рзырышьҭти, уаҟа иадырбеит ацхыраара ишазыхио.
Ашьыжь иҩаҵԥрааз аҳаирплан, аԥырра аа-минуҭк рышьҭахь, асааҭ 5.40 мск рзы арадарақәа рҟынтәи ибжьаӡит. Ту-154 апассаџьырцәа дреиуан агәыҳалалратә фонд "Справедливая помощь" адиректор Елизавета Глинка, (аҳақьым Лиза), иара убасгьы Александров ихьӡ зху ашәаҳәареи акәашареи рансамбль алахәылацәеи урыстәылатәи ажурналистцәеи.
