АҞӘА, ԥхынҷкәын 29 — Sputnik, Бадри Есиава. Аԥсны Аминистрцәа Реилазаара аилатәараҟны ирыдыркылеит атәым ҳәынҭқарра аҟынтәи асоциалтә шәарақәа змоуа Аԥсны хазы игоу атәанчаҩцәа ркатегориақәак есымза ашәарацҵа роуразы азакәан апроект.
"Есымзатәи ашәарацҵа роулоит 14 категориа атәанчаҩцәа", — иҳәеит Аԥсны Аџьеи асоциалтә еиқәыршәареи рзы аминистр Руслан Аџьба.
Аџьба иажәақәа рыла зышықәс анаӡареи зусурашықәси инарықәыршәаны атәанчахәы зауа ирзацҵахоит зықьмааҭ, зҽаԥсазтәыз аусзуҩ ҳәа ахьӡ змоу атәанчаҩцәа ирзацҵахоит 500 мааҭ, ашахтақәа рҟны аус зуаз атәанчаҩцәа ирзацҵахоит 500 мааҭ.
Аџьба иара убасгьы иҳәеит аҭаацәа ныҟәызгоз ахаҿы ицәыӡра инамаданы аусура злымшо аҭаацәа рхаҭарнакцәа ироуа ашәарақәа ирыцлоит 700-700 мааҭ аԥара, ани аби змам ахәыҷқәеи, аџьа аинвалидцәа I, II, III акатегориақәа ирызрыцырҵоит зқьы-зықь мааҭ, ихәыҷаахыс ихымхәоу – 500 мааҭ, рышықәс аллеи рхымхәаралеи асоциалтә тәанчахәы зауа 850 мааҭ рзацырҵоит.
Ақәҵара апроект аминистрцәа еицҿакрыла ирыдыркылеит.
