АҞӘА, ажьырныҳәа 11 – Sputnik. Николас Мадуро аҳәамҭа ҟаиҵеит аоппозициатә Парламент гәҭакны ишамаз аҳәынҭқарратә еиҿкаара аԥсахра.
"Атәыла Ахада иаҳасабала аҳәара ҟасҵоит, атәыла Аконституциа аилагара хырыҩ азырымурц", — иҳәеит Мадуро аҳәынҭқарратә телехәаԥшра аефир аҟны.
106-ҩык адепутатцәа рыбжьы ззырҭииз Апарламент аӡбра ашьҭахь атәыла Аӡбырҭа хада аҳәамҭа ҟанаҵеит Амилаҭтә ассамблеиа атәыла Ахада иҭыԥ иахыгараз азинмчра аманы иҟам ҳәа.
"Аконституциа ахәҭаҷ 336 ишаҳәо алеи аус зуа азакәанԥҵара инарықәыршәани адепутатцәа ирыдҵан дара рконституциатә зинмчра аҳәаақәа ирҭысуа иарбанызаалак актк адкылара апроцесс мап ацәыркырц", ҳәа аҳәоит Аӡбарҭа аҳәамҭаҟны.
Венесуела Апрезидент Мадуро иқәгаразы Апарламент иҟанаҵаз аҽазышәарақәа лыҵшәадахеит, избанзар 1999 шықәсазтәи Венесуела Аконституциа инақәыршәаны атәыла ахада иганахь ала аимпичмент апроцесс амҩаԥгара азин ыҟам. Аха иара убри аан Аконституциа ахәҭаҷқәа 222, 232 иазыԥхьагәарҭоит анагӡаратә мчра Апарламент аганахь ала иаиур зылшо ахылаԥшра аформақәа.
Хаҭала, аҳәынҭқарратә усзуҩы "иполитикатә ҭакԥхықәра" алацәажәара, атәыла ахада иԥсраан "иҟамзаара" алаҳәара мамзаргьы "имаҵура аанижьит" ҳәа алаҳәара.
Венесуелатәи акризис уадаҩхеит шықәсык аԥхьа аоппозициатә Парламент аусура ианалага ашьҭахь. Уажәтәи аамҭазы азакәанԥҵаратәии анагӡаратәии мчрақәа рыбжьара иарбанызаалак усуратә еиныррак ыҟан иҟам.
Апрезидент Мадуро уаанӡа алаҳәара ҟаиҵахьан аоппозициа "апарламент амчра анапахь аагара аҽазнашәеит" ҳәа, Апарламент акәзар — атәыла ахада атәыла Аконституциа еилеигоит ҳәа аҳәамҭа ҟанаҵахьан.
