АҞӘА, ажьырныҳәа 19 — Sputnik, Бадри Есиава. Аԥсны Апрокурор хада Зураб Ачба аусбарҭа аколлектив дырдырразы дицнеиит атәыла Ахада ихаҭыԥуаҩ Витали Габниа.
Витали Габниа иазгәеиҭеит Зураба Ачба икандидатура шықәыргылаз ареспублика аоппозициатә мчқәа Рблоки атәыла анапхгареи реилацәажәарала.
"Атәыла Ахада гәҭакны имам шәусура аҽалагалара, аха аусура алҵшәа амазар шакәу – уи ихымԥадатәиу акоуп. Уи адагьы иарбанызаалак аполитикатә мчрақәа шәусура аҽалагалара азин рымам", — иҳәеит Габниа.
Габниа ҭабуп ҳәа иеиҳәеит абри амаҵзура уаанӡа иахагылаз Нури Ҭарба.
Аԥсны Ашәарҭадаратә Хеилак амаӡаныҟәгаҩ Муҳаммед Кьылба иазгәеиҭеит апрокуратура ҵыхәтәантәи аамҭазы аусура шҭышәынтәалаз атәы.
"Апрокуратура хада аколлектив рпотенциал ҳаракуп ҳәа азуҳәар алшоит. Сгәы иаанагоит иахьатәи Апрокурор хада еиҵеиҳароуп ҳәа иара иаанӡа имҩаԥгаз аусқәа", — иҳәеит иара.
Зураб Ачба иазгәеиҭеит аусбарҭаҿы аус зуа аҿар акыр дышрықәгәыӷуа, азҵаарақәа зегьы еилибакаарыла, еилацәажәарыла рҭышәныртәалара хымԥаданы ишишьо, азакәан аҳәаақәа рҭыҵра алшоны ишимбо.
Ачба иара убасгьы иҳәеит арахь ааира иара изы акыр ауадаҩрақәа, азхәыцрақәа шацыз.
"Ари даара ҭакԥхықәра дууп. Исҳәар сылшоит сыԥсҭазаараҿы реиҳа иуадаҩыз ҭагылазаашьан исыԥхьаӡоит ҳәа абри аҭыԥ ахь сааира", — иҳәеит Ачба.
Зураб Ачба диит абҵара 18 1958 шықәса рзы Гәдоуҭа араион Приморское ақыҭан. Аԥснытәи Аҳәынҭқарратә университет аҭоурых-иуристтә факультет доушьҭымҭоуп.
1994 шықәса раахыс апрокуратура аорганқәа рҟны аус иуеит.
1997 ш. – Аҟәа араион апрокурор ихаҭыԥуаҩ
2001ш. – Аҟәа араион апрокурор.
2005ш. – Гәылраԥшь араион апрокурор.
2011ш. – Гагра араион апрокурор.
