АҞӘА, ажьырныҳәа 18 – Sputnik, Бадраҟ Аҩӡба. Ареспубликатә хәышәтәырҭа атерапиа аҟәша аиҳабы Анжела Арчелиа ҳкорреспондент изеиҭалҳәеит Аӡаахра аухазы аӡы аҭалара зыгәҭаку дарбанызаалак игәабзиара уашәшәырамзароуп ҳәа.
"Згәы бзиам, иазыҟаҵам ауаҩы аӡы аҽыҭшьра иԥырхагахоит. Арахь иаҵанакуеит зшьақәыӷәӷәара ҳараку, здашәпақәа аварикоз ҭбаара рымоу, агәыхь чымазара змоу, арыԥҳа чымазара змоу", — лҳәеит аҳақьым.
Арыжәтә ыжәны иҟоу рзы зынӡаскгьы азин имам аӡы хьшәашәа аҭалара ҳәа ацылҵоит Арчелиаԥҳа. Агәабзиара аганахь ала проблема змам ауаагьы аӡы аҽӡаашьра рҽазыҟарҵароуп.
"Ашьақәыӷәӷәара шәатәуп, ажьышәқәа рԥхатәуп", — лҳәеит лара.
Анжела Арчелиаԥҳа лажәақәа рыла аӡы аҭалара аԥхьеи ашьҭахьи ачаи ршы ужәыроуп, уцәеи-ужьи аҳауеиҭакра ианааларц азы.
