АҞӘА, ажьырныҳәа 23 — Sputnik. 3,5 тонна агуманитартә цхыраагӡа нанашьҭит еиҿагылоу аганқәа реиныршәаразы Урыстәылатәи ацентр, хықәкыла Латакиа апровинциа аиланхарҭа Дерзеинун инхо ауааԥсыра рзы. Абри азы адырра ҟанаҵеит ацентр аофицер, амаиор Андреи Глушков иажәақәа рыла РИА Новости.
"Аҽазныкгьы Латакиаҟа ҳааит. Ҳара лассы-лассы арахь ҳаалоит. Уажәазы арахь иаагеит ашьақар, ашьаҳариа, ачашыла, аконсервқәа. Иааидкылан иаагаз 3,5 тонна рҟынӡа инаӡоит", — иҳәеит Глушков.
Ацентр адырраҭарақәа рыла ирацәаҩуп ацхыраара даара изҭахны иҟоу ауаа. Ақыҭа аиҳабы Дерзеинун Махмуд Ахмед ҭабуп ҳәа реиҳәеит Урыстәыла анапхгара, ажәлар иааиԥмырҟьаӡакәа имҩаԥырго ацхырааразы.
"Хаҭала ҳара ҳқыҭаҟны раԥхьаӡа акәны имҩаԥгоуп акциа. Ҳара зегьы ҳахьӡала ҭабуп ҳәа расҳәоит Урыстәыла анапхгареи атәылауааи. Ари ацхыраара ҳара амч ҷыда ҳнаҭоит, доуҳала ҳарӷәӷәоит» — иҳәеит иара.
Ацентр аибашьра еиҳа иӷәӷәаны ааха знаҭаз аҭыԥқәа Хомс, Хама, Латакия, Тартус, Дамаск, Алеппо уҳәа рҟны инхо ауааԥсыра ацхыраара рырҭоит.
