АҞӘА, ажьырныҳәа 24 — Sputnik, Рада Ажьиԥҳа. Емма Кьылба лхы инаркны лшьапы аҟынӡа аҧсуара датәын, дпатриотын, абри атәы иҳәеит, аҵарауаҩ Владимир Агрба.
"Емма Кьылԥҳа сара дыздыруеишьҭеи акыр шықәса ҵуан. Сара аԥсуа институт аҟны аус зуан усҟан, лара даспирантын Қарҭтәи ауниверситет аҟны, аусура ҳәа ҳаинститут ахь дааит. Лара иҭылҵаауан Баҭым инхо асаӡқәа рдиалект. Лара, Аԥсны Афырхаҵа, апатриот ду, сҩыза гәакьа, аҵарауаҩ ду Виачеслав Бганба иԥшәмаԥҳәыс лакәын. Уи еиҳагьы ҳаизааигәанатәеит", — ҳәа иҳәеит Агрба.
Агрба иажәақәа рыла, ҵарауаҩык лаҳасабала Емма Қьаамын-иҧҳа иҟалҵахьаз маҷмызт, абызшәа аҭҵаара иадҳәалан илыҩхьаз астатиақәа амонографиа иаҩсуан.
"Емма еидкылан илыман аҟыбаҩ змоу аспирантцәа ҿарацәа, урҭ дырхылаҧшуан, еснагь имҩақәылҵон. Избанзар абызшәаҭҵаара лара илыҧсҭазааран", — ҳәа азгәеиҭеит аҵарауаҩ.
Иара иажәақәа рыла, Емма Кьылба хҧа-ҧшьба шықәса раахижьҭеи, лгәамбзаира даргәамҵуан, аха лнапы злакыз аус, зынӡагьы дагхарц лҭахӡамызт.
