АҞӘА, ажьырныҳәа 25 – Sputnik, Роберт Џьопуа. Аԥсны Амилаҭтә Банк араӡынтә ԥсар азы аҭауад Александр Чачба исахьа иара иԥсы анҭазтәи ифотосахьа иақәҭырхит, иҳәеит асахьаҭыхыҩ Баҭал Џьопуа.
Амилаҭтә Банк Ниу-Иорк имҩаԥысыз анумизматикатә фотоцәыргақәҵаҟны аԥсар "Александр Чачба" зегь раасҭа зинтерес ркыз маҭәарны иҟалеит, ҳәа ҳкорреспондент изеиҭалҳәеит Амилаҭтә Банк аусзуҩ, аделегациа алахәыла Лиана Агрԥҳа.
"Иазгәаҳҭар ҳҭахуп Александр Шервашиӡе-Чачба исахьа зныз аԥсар зегь раасҭа аинтерес шыркыз. Раԥхьа иҵаауан—Шерлок Холмс?" — лҳәеит Агрԥҳа.
Чачба исахьа автор, асахьаҭыхыҩ Баҭал Џьопуа иажәақәа рыла, иусумҭа Александр Чачба ифотосахьа ишақәҭыху.
Афотосахьа жәашықәсаҟа раԥхьа ибахьан. Уажәы аԥсар азы асахьа анҭихуаз ихаҿ иаанхаз аҭеҭԥыш игәаларшәаны ауп аус шиуаз. Иусумҭа аныхиркәша ашьҭахь ауп афотосахьеи иареи анеиҿирԥш.
Асахьаҿы иарбоуп иара убасгьы диоскураа рыххаҵақәа, уи асахьаҭыхыҩ иадиҳәалоит Чачаа ргерб аҟны арҭ аххаҵақәа ихадоу елементны рыҟазаара.
"Аԥсны иналукааша ахаҿқәа" асериа адагьы Аԥсны Амилаҭтә Банк Ниу-Иорктәи ацәыргақәҵахь инаргеит аԥсарқәа рсериақәа: "Аԥсны ақалақьқәа" иара убас "Аԥсны абаақәа".
