АҞӘА, ажьырныҳәа 30– Sputnik, Бадраҟ Аҩӡба. Аҟәа ақалақь аҟны амҩақәа рахь инаҳашьҭит автобус дуқәа, ҳәа радио Sputnik адырра аиҭеит Аҟәа ақалақь Ахада ихаҭыԥуаҩ Леон Кәарҷиа.
"Алашарбага араион, араион Ҿыц, Синоп иара убасгьы Ҷанба имҩа рахь инаҳашьҭит автобус дуқәа, еиҳа аԥышәа змоу арныҟәаҩцәа рықәыртәаны. Атранспорт аныҟәара еиԥҟьоуп аха уи мзызс иамоу жәдыруеит", — иҳәеит Кәарҷиа.
Шьыжьы инаркны атранспорт аныҟәара шыуадаҩу далацәажәеит иара.
"Иҳагәҭакын атроллеибусқәа ҩба ракәзаргьы аусура иҭҳажьырц, аха урҭ адепо ахь иҳархынҳәыр акәхеит", — иҳәеит Кәарҷиа.
Асоура шаахкәалакь апассаџьырцәа рымҩангаразы ишалшо ала ақалақь транспорт амҩахь инаҳашьҭуеит ҳәа азгәеиҭеит иара.
Леон Кәарҷиа иара убасгьы дазааҭгылан иҳәеит аҳауатә ҭагылазаашьа уадаҩқәа ҽазыҟаҵарыла рԥыларазы ҵыԥх иаԥҵан аоперативтә штаб ҳәа.
Ажьырныҳәа 28 — 29 руха излагаз асоура шьыжьынӡа ихымкәеит. Ақалақь транспорт аныҟәара ԥкхеит. Ашколқәеи ахәыҷбаҳчақәеи русура аамҭала иаанкылоуп.
