АҞӘА, жәабран 2 – Sputnik, Бадраҟ Аҩӡба. Аԥсны иаауа аԥсшьаҩы ҳаԥсадгьыл иазку аинформациа неиҵыхны иоуазар ахәҭоуп, иҳәеит Аԥсны Акурортқәеи атуризми рзы аминистр ихаҭыԥуаҩ Асҭамыр Ахба Sputnik аҟны имҩаԥысыз апресс-конференциа аҿы.
"Иаҳҳәап сара сыԥсшьаҩуп, Гагра аекскурсиа сыҟан, аха Гагра ада Аԥсны ҭыԥ ыҟаӡами? Сара ԥсшьаҩык иаҳасаб ала исҭахуп сызҭаауа атәыла иазку аинформациа нарҭбааны исоур. Ҳара аҭоурых ду ҳамоуп, аԥсшьаҩцәа ахьноугаша, иахьааугаша аҭыԥқәа рацәоуп", — азгәеиҭеит иара.
Уи иажәақәа рыла, аекскурсиа амҩаԥгаҩцәа аекскурсиа ахьымҩаԥыргозаалак, иахьаҭаауа аҭыԥ адагьы, ирдыруазар ауп иааидкыланы Аԥсны аҭоурых, иҳамоу аҵасқәа уҳәа ҳаԥсадгьыл иаҭаауа ауаа рзы еиуеиԥшым адыррақәа.
"Атурфирмақәа рҿы иҟаз аметодистцәа, аекскурсиа амҩаԥгаҩцәа азыҟарҵон. Иҟалон аҭагылазаашьақәа, аметодистцәеи, аекскурсиа амҩаԥгаҩцәеи аминистрра ахыбраҿы ианеибадыроз", — азгәеиҭеит Ахба.
Аекскурсиа амҩаԥгаҩ идыррақәеи иазыҟаҵареи дузар ауп, избанзар ҳаԥсадгьыл иаҭаауа ауаҩы иара илоуп Аԥсны иазыҟазаашьа шышьақәгыло, иҳәеит Асҭамыр Ахба.
