АҞӘА, жәабран 9 – Sputnik, Бадри Есиава. Аԥшьаша, жәабран 9 рзы Аԥсны Аԥыза-министр ООН акоординатор дидикылеит. Аԥсны Аԥыза-министр Беслан Барцыци ООН акоординатор Нилс Скотти реиԥылараан ирылацәажәан 2017 шықәсазы Аԥсны иахьаҵанакуа инагӡахараны иҟоу ООН апрограммақәа.
"Ҳара ҳазыхиоуп шәыпрограммақәа ԥхьаҟагьы рырҿиара адгылара, рылацәажәара", — иҳәеит Аԥыза-министр асас диҿцәажәо.
ООН акоординатор Нилсон Скотт Аԥсны аиҳабыра ҭабуп ҳәа реиҳәеит иҟарҵо ацхырааразы, хаҭала зыргылара иаҿу ахәаахәҭырҭа-маҷ азы. Ахәаахәҭырҭа маҷ аҩызцәа аҽа жәба ареспублика ахы-аҵыхәа идыргылараны иҟоуп ақыҭауаа раалыҵ аҭира алдыршаларц азы. Скотт аусурақәа шцо азы афотосахьақәа иирбеит Беслан Барциц.
"Иахьатәи аамҭазы Аԥсны аус руеит ООН аиҿкаарақәа хԥа: ООН аҿиара апрограмма, Ахәыҷтәы фонд, УВКБ", — иҳәеит Скотт.
Акоординатор иҳәеит иара убасгьы иаарласны Аԥсны аусура иалагараны ишыҟоу аԥшьбатәи аиҿкаара — "Женщины ООН".
Беслан Барциц уи аҭакс иазгәеиҭеит ООН аусура еснагь адгылара шаиуа.
ООН Аԥҟаԥҵәа рыдкылан Сан-Франциско рашәарамза 26 1945 шықәса рзы.
