АҞӘА, жәабран 13 – Sputnik, Роберт Џьопуа. Ашәахьа, жәабран 13 рзы Аԥсны Ахада иԥылараан Аԥсны Агәабзиарахьчара аминистр Андзор Гоов иҳәеит иаарласны зыргылара иалагараны иҟоу амедицинатә комплекс ҿыц Ареспубликатә хәышәтәырҭа аҵакырадгьыл аҿы иргылахоит ҳәа.
"Ааигәа аусутә еиԥылара мҩаԥысит. Ҳара ҳаҭааны иаабеит ацентр дыргылараны иахьыҟоу аҭыԥ. Амедицинатә центр аргылара иартәоит 350-400 миллион мааҭ аԥара. Арҭ аԥарақәа аинвестициатә ҟазшьоуп рымоуп. Ишьақәыргылоуп ацентр Ареспубликатә хәышәтәырҭа аҵакырадгьыл аҟны иргылахоит ҳәа. Ҳтәылуаа, амедицинатә ԥгаԥса аполис змоу абри ацентр аҟны хәыда-ԥсада рҽырхәышәтәрлар алшоит", — иҳәеит Гоов.
Иара иазгәеиҭеит ацентр аҟны аҟәшақәа ԥшьба — акардиохирургиа, агемодиализ, алабораториа, арепродуктивтә технологиақәа шаартхо.
Аминистр иара убасгьы атәыла Ахада иирдырит Аԥсны инхо Урыстәыла атәылауаа амедицинатә полисқәа рыҭара аус шцо. Гоов иажәақәа рыла аполисқәа рыҭахалоит атәыла араионқәа фба рҟны.
"Аполис амазаара ҳтәылауаа инхарҭәааны амедицинатә цхыраара роура иацхраауеит Урыстәылатәи Афедерациа иахьаҵанакуа зехьынџьара", — иҳәеит аминистр.
Руаль Ҳаџьымба иазгәеиҭеит аполис зауа ауаа рганахьала адыррақәа шышьақәыргылатәу.
"Ауаа медицинатә полисла реиқәыршәара адагьы ирызхәыцтәуп урҭ мҩаԥызго ауаагьы. Насгьы ҳара иаадыруазароуп амедицинатә цхыраара зауз шаҟаҩы ыҟоу. Адыррақәа рбаза еиҿкаатәхоит", — иҳәеит Ҳаџьымба.
