АҞӘА, жәабран 14 – Sputnik, Бадри Есиава. "Клуб ИуНЕСКО Абхазиа" Италиа ашәҟәы иҭаҩуп. Иара азырхоуп Аԥсны ахьӡ-аԥша аӡыргара, аларҵәара, европатәи атәылақәа руааԥсыра Аԥсны аҭоурых, акультура, ақьабз, аҵас, абызшәа уҳәа дырдырра ҳәа ҳкорреспондент изеиҭеиҳәеит Аԥсны Адәныҟатәи аусқәа рминистр ихаҭыԥуаҩ Кан Ҭаниа.
"ИуНЕСКО аклуб ари ИуНЕСКО аидеалқәеи аидеиақәеи адгылара рызҭо ассоциациоуп. Иара иалоу реиҳарак археологиа, аҭоурых, архитектура русхк ахаҭарнакцәа роуп. Арҭ аклубқәа ирымоуп Афедерациақәа. Уажәы Аԥсынгьы урҭ ирыхәҭакхеит", — иҳәеит Ҭаниа.
Кан Ҭаниа иҳәеит италиатәи аҭыжьымҭақәа руак "IL MATTINO" аҟны ишанылахьо "Клуб ИуНЕСКО Абхазиа" ашәҟәҭаҩра иахысит ҳәа. Уа инарҭбааны иалацәажәоуп Аԥсныи Италиеи ҭоурыхла реимадара, Генуеизтәи ацивилизациа аамҭақәа инадыркны иахьанӡа. Аклуб аусура аҳәаақәа ирҭагӡаны иазыԥхьагәаҭоуп Аԥсныҟа еиуеиԥшым аекспертцәа рааԥхьара.
"Ҳара Италиа абри аус амҩаԥгара еиҳа иаҳзымариан, избан акәзар, уаҟа иҭаҩуп, аус руеит "Ассоциация Европа-Абхазия", "Абхазский институт культуры". Иара убасгьы Италиа аус иуеит Аԥсны Адәныҟатәи аусқәа рминистрра анапынҵаҷыдақәа рзы Ацҳаражәҳәаҩ Вито Гриттани", — иҳәеит Ҭаниа.
"Клуба ИуНЕСКО Абхазиа" апрезидентс дҟаҵоуп Инара Таниаԥҳа, уи лхаҭыԥуаҩыс – Италиа атәылауаҩ Акиле Ночито.
