ГАЛ АРАИОН, жәабран 24 — Sputnik, Роберт Џьопуа. Џьуартәи аӡеизакырҭеи Аԥсны аҵакырахь иҟоу агенерациеи еидызҳәало адеривациатә тоннель 2018 шықәса рзы аремонт азура азыԥхьагәаҭоуп. Абри атәы аԥсуа журналистцәа ирзеиҭеиҳәеит ЗҲәА "ЕгрыГЕС" анапхагара ахантәаҩы Леван Мебониа.
"Сынтәа, жьҭаарамзазы имҩаԥаагоит атендер, иалаҳкаауеит апроекттә еилахәыра, ҽааны – жәабранмза инаркны рашәарамзанӡа аремонт усурақәа мҩаԥаагоит. Абасоуп планны иҳамоу иахәҭоу аԥаразоужьра ҟалар", — иҳәеит Мебониа.
Мебониа иажәақәа рыла аиҭашьақәыргыларатә усурақәа рыхәшьара мҩаԥыргоит 10 рҟынӡа тәыла рҟынтәи аилахәыра ҷыдақәа.
"Хықәкны иҳамоу аусурақәа рхышәа-ҵышәа ашьақәыргылареи атоннель аҭагылазаашьеи роуп. Агәаҭарақәа ирылахәуп Франциа, Урыстәыла, Китаи, Германиа, Бельгиа, Ҭырқәтәыла. Иааидкыланы 12 тәыла рҟынтәи 15 еилахәыра", — иҳәеит иара.
Атоннель аура 15 километра иҟоуп, аҭбаара–10 километрак. Аремонт мҩаԥгахоит еиҳа иуашәшәыроу аҭыԥқәа рҟны.
"Атоннель ахы инаркны аҵыхәанӡа аремонт ҳзазуӡом. Иалкаахоит ԥсыхәа ахьамам аҭыԥқәа. Акредит ҳанаҭоит Аҿиараз Европатәи абанк. ЕгрыГЕС акредит агоит Қырҭтәыла аиҳабыра рыхәдықәҵарала. Иара иартәоит 10 миллион евро", — иҳәеит Мебониа.
Атоннель амониторинг хацыркхеит жәабран 19 рзы. Агәаҭарақәа раан ГерыГЕС аамҭала иаанкылоуп. Хәажәкыра 3 инаркны атоннель аусуразы еиҭаартхоит.
