Sputnik, Владимир Бегунов
Аԥсны Акультура аминистр Ельвира Арсалиаԥҳа иазгәалҭеит, иарбанызаалак Аԥсны иқәыргылахо абаҟақәа амонументалтә ҟазаразы акомиссиа алаԥш ахганы алкаақәа ҟанаҵароуп ҳәа.
Акомиссиа аԥҵоуп Аминистрцәа Реилазаараҟны. Иара напынҵаны иамоуп абаҟа аҭоурыхтәи, акультуратәи, асахьаркыратәи хәшьара аҭара.
"Ҳара иаҳҭахуп акыр шықәса зҵазкуа апрограмма аиҿкаара. Иалкаатәуп аԥхьа иҟаҵатәуи, аамҭала узнахар ауеи", — лҳәеит Арсалиаԥҳа.
Аҩбатәи аилатәараан акомиссиа ирыдыркылеит еицырдыруа ауаажәларратә усзуҩы, аҭоурых наукақәа рдоктор Гьаргь Ӡиӡариа ибаҟа апроект (Автор – Геннади Лакоба). Иара абаҟа авариантқәа ҩба рыдигалеит. Иалхын руак. Уажәшьҭа абаҟа ахьықәыргылахо аҭыԥ алыркаауеит.
"Сара Гьаргь Ӡиӡариа ибзианы дыздыруан. Ҩеижәа шықәса инапаҵаҟа аус зуан", — иҳәеит аминистр лхаҭыԥуаҩ Баҭал Кобахьиа.
Акомиссиа алахәыла Сергеи Шамба ажәалагала ҟаиҵеит абаҟа Гьаргь Ӡиӡариа еиҳабыс дызмаз Аԥснытәи аинститут ахьгылаз аҭыԥ аҟны иргылахарц. Аидеиа ргәаԥхеит, аха макьаназы иазхәыцтәуп.
"Ҳара аҿар рахь ааԥхьара ҟаҳҵоит. Шәацәымшәан аиндаҭларақәа рыҽрылархәра, акомиссиахь иаашәышьҭла аескизқәа", — иҳәеит Кобахьиа.
Апоет Иуа Коӷониа ибаҟа апроектқәа ҩба (авторцәа: Иванба, Адлеиба) акомиссиа изахымсит.
Ауаажәларратә еиҿкаара "Аруаа" рыҳәарала еиҿкаауп Аԥсны Афырхаҵа Мушьни Хәарцкьиа ибаҟазы аконкурс. Иара ақәыргылара азыԥхьагәаҭоуп Лыхны ақыҭан, Афырхаҵа анышә дахьамадо аҭыԥ аҿы.
Баҟақәак рганахь ала акомиссиа иаднакылеит аӡбра урҭ рзы аконкурс 2017-2018 шықәсқәа рзы имҩаԥгахарц азы.
