АҞӘА, жәабран 27 – Sputnik, Амра Амҷԥҳа. "Ахьышьтрахь" – абас ахьӡуп Аԥсны ажурналистцәа Реидгылеи арепатриациаз Аҳәынҭқарратә еилаки еицымҩаԥырго аконкурс. Иара тема хаданы иамоу арепатриациеи зыԥсадгьыл ахь ихынҳәыз ҳџьынџьуаа аратәи аҭагылазаашьақәа рышьцылареи роуп.
Аӡыргараҟны арепатриациаз Аҳәынҭеилакы ахантәаҩы Вадим Ҳаразиа иазгәеиҭеит ареспублика амассатә информациа ахархәагақәа рҟны ишахәҭоу иазхьаԥшым Аԥсныҟа ихынҳәыз ҳџьынџьуаа рыԥсҭазаара.
Ҳаразиа ишиҳәаз ала 10 000 рҟынӡа аԥсуа тәылауаҩшәҟәқәа рыҭоуп ҳџьынџьуаа. Урҭ рҟынтәи 3700-ҩык рҭаацәеи дареи Аԥсны инхоит.
Аԥсны ажурналистцәа Реидгыла ахантәаҩы Руслан Ҳашыг дазааҭгылан иҳәеит аконкурстә усумҭақәа ганрацәала ареспублика атәылауаа рыԥсҭазаара аадырԥшуазароуп ҳәа.
"Арепатриантцәа рҭаацәараҟынтәи ахәыҷы ашкол ахь дцозар – уи ажурналистцәа рзы ихымԥадоу темазароуп, арепатриант ихатә уск ааиртызар – уигьы ажурналист даҩымсуазароуп. Дареи ҳареи ҳаиқәгәырӷьо ҳаҟазароуп. Ажурналистцәа зегьы рахь аҳәара ҟасҵоит – аамҭа-аамҭала акәымкәа арепатриантцәа есыҽнытәи теманы иҟазаарц. Агәра згоит абри аконкурс иалнаршап ҳәа иаҳзымдыруа акыр ҳардырра", — иҳәеит Ҳашыг.
Аконкурс ахь ирыдыркылоит аԥсышәалеи урысшәалеи иҩу ажурналисттә материалқәа, арадиои ателехәаԥшреи рахь инаго аматериалқәа, ажанр аганахь ала ԥкрак рымамкәа.
Руслан Ҳашыг иажәақәа рыла аконкурс ажиури ахәшьара зырҭо апроблема инарҵауланы аарԥшышьоуп, аҳәашьоуп, ауаҩы ихы-иԥсы аҟынӡа анагашьоуп.
Апремиақәа хԥа шьақәыргылоуп: актәи – 20 000 мааҭ, аҩбатәиқәа ҩба –15 000-15 000 мааҭ, ахԥатәиқәа ҩба – 10 000-10 000 мааҭ.
Аусумҭақәа рыдыркылоит 2017 шықәса ԥхынҷкәын 1 аҟынӡа.
Аԥсны ажурналистцәа Реидгыла ирыланаҳәо аҩбатәи арҿиаратә конкурс темак аҳәаа иҭагӡаны иҟам. Уа ахәшьара ззыҟарҵо ажурналисттә усумҭа ахаҭабзиароуп.
"Ажәа — амалқәа зегьы ирмалуп" ҳәа зыхьӡаҳҵаз аконкурс аҟны ҳара Аԥснытәи ажурналистцәа ирыдаагалоит аиндаҭлара, аҟазара арҳаракра. Абиблиаҟны иаҳәоит раԥхьа иҟаз Ажәоуп ҳәа. Ажурналист иусураҟынгьы усоуп. Аконкурстә усумҭақәа иртеманы иҟалар алшоит аполитика инаркны аекономика, акультура, адоуҳа рҟынӡа еиуеиԥшым аусхкқәа", — иҳәеит Ҳашыг.
Араҟагьы апремиақәа хԥа шьақәыргылоуп: актәи – 20 000 мааҭ, аҩбатәиқәа ҩба –15 000-15 000 мааҭ, ахԥатәиқәа ҩба – 10 000-10 000 мааҭ.
Аусумҭақәа рыдыркылоит 2017 шықәса ԥхынҷкәын 1 аҟынӡа.
