АҞӘА, жәабран 27 — Sputnik, Рада Ажьиԥҳа. Аԥсны Аҳәынҭқарра 2017 шықәса лаҵарамзазы Тхеквандо Адунеизегьтәи Афедерациа иалахәхоит иҳәеит Аԥснытәи Афедерациа апрезидент Оҭар Гогәуа.
"Тхеквандо Аԥснытәи Афедерациа официалла иаԥҵан 2000 шықәса рзы. 2017 шықәса лаҵарамзазы Тхеквандо Адунеизегьтәи Афедерациа иалахәхоит Тхеквандо Аԥснытәи Афедерациагьы. Сара схы-сыԥсы зегьы убри иазкын, иахьа уи лабҿабахоит", — иҳәеит Оҭар Гогәуа.
Гогәуа иажәақәа рыла тхеквандо аҟны еснагьы аԥсахрақәеи аиҭакрақәеи мҩаԥыргоит.
"Тхеквандо аҟны еснагь аԥсахрақәеи аиҭакрақәеи уԥылоит. Ҳҽазыҟаҵаратә семинарқәа раан урҭ ртәы ҳарҳәалоит, ҳара ҳакәзаргьы уи ҳазыхиоуп", — иҳәеит иара.
Тхеквондо (WTF) Афедерациа ажьырныҳәа 1 2017 шықәса инаркны амчра зауа ариашарақәа рыланаҳәеит.
Урҭ амчра нагӡа роуеит алада Кореиатәи ақалақь Муджу аиндаҭларақәа анымҩаԥыслак ашьҭахь.
