Sputnik, Амра Амҷԥҳа
5 инаркны 13 шықәса рҟынӡа зхыҵуа ҩынҩажәижәабаҩык инареиҳаны ахәыҷқәа Аҟәатәи амҽышатә школ иаҭаауеит.
"Аԥхьаҵәҟьа гәыԥк акәын иҟаз, уажәы ахәыҷқәа рхыԥхьаӡара анырацәаха ҩ-гәыԥк еиҿаҳкааит, — иҳәеит аиеромонах Давид (Ӷәазаа). – аурокқәа рҟны Анцәа изакәан ҳҵоит, иаҳҵоит Ажәытәи Аҿатәи ҳәахьақәа, ауахәаматә ныҳәақәа рҭоурыхқәа, аԥсышәала аматанеирақәа".
Аиеромонах иажәақәа рыла араҟа азхьаԥшра ду амоуп ахымҩаԥгашьа, аетикет.
"Иахьазы ари зегьы акраҵанакуеит. Ахәыҷы изеиҭаҳәатәуп изааигәоу пату шиқәҵатәу. Абзиабара шаарԥштәу, ламысцқьала ахымҩаԥгара шаҭаху, аҭаацәа ишырзыӡырыҩлатәу. Абарҭ зегьы уаныхәыҷу иуларааӡароуп", — иҳәеит аиеромонах Давид (Ӷәазаа).
Шықәсык аахыс ахәыҷқәа ирҵаз аадырԥшуан ашьыжьтәи аныҳәаҿы рҭаацәа рҿаԥхьа. Азал хадаҿы иқәыргылан асахьақәа.
Араҟа имҩаԥыргон ақьырсиан ныҳәа иазку ақәгыларақәа. Анцәа имаҵуцәа рыдагьы ахәыҷқәа рдыррақәа рымардоит аҭаацәа. Наталиа Шамԥҳа лхәыҷқәа анаалга ашьҭахь лхаҵеи лареи амузыка рырҵара иалагеит.
"Аԥхьа ахәыҷқәа ашкол ахь иаагеит, нас амузыка дырҵара ҳалагеит еизоз. Зегьы уск ҳҽазаҳкит. Ашкол аидеиа акәзар ишьахәуп. Ахәыҷқәа шыхәыҷу ақьырсиан культура иадҳәалахоит", — лҳәоит Наталиа Шамԥҳа.
Ахәыҷқәа арахь иаарго иалагеит урҭ рызҵаарақәа рҭакқәа аныуадаҩха.
"Анцәа, ауахәама ирызкыз азҵаарақәа ҳарҭо ианалага, смоҭацәа арахь иаазгеит", — лҳәеит Татиана Селиутина.
Ирина Кәасиаԥҳа шықәсык аԥхьа арахь даалгеит лаҳәшьаԥа. Лара иазгәалҭоит ари ашықәс ала иара ихымҩаԥгашьа, иҟазшьа акыр ишеиӷьхаз.
"Сара аҭаацәа зегьы ирасҳәоит рхәыҷқәа амҽышатә школ ахь иааргаларц. Уи дара рзы инасыԥхоит", — лҳәоит Кәасиаԥҳа.
Аныҳәа ахыркәшамҭазы ахәыҷқәа ажәҩан ахь ихаларҵеит ԥшшәы рацәала еилаз ампышҭақәеи ақьаадлых ҳәыҳәқәеи.
