АҞӘА, хәажәкыра 1 — Sputnik, Рада Ажьиԥҳа. Нестор Лакоба иҭоурых-мемориалтә музеи Баграт Шьынқәба иҩны-музеии раартра Аԥсны аҳәынҭқарразы акыр аҵанакуеит, абри атәы лҳәеит Акультура аминистр Ельвира Арсалиаԥҳа.
"Арҭ амузеиқәа культуратә центрхап ҳәа сгәы иаанагоит. Баграт Шьынқәба имузеи аус ауеижьҭеи акыр шықәса ҵуеит. Уаҟа имҩаԥыргоит еиуеиԥшым ауснагӡатәқәа: имш иира, апоезиа ахәылԥызқәа. Ишыжәдыруа еиԥш, сынтәа Жәлар рпоет диижьҭеи иҵуеит шәы-шықәса, уи инамаданы иаԥҵан аҳәынҭқарратә комиссиа. Ражәалагалала Баграт Шьынқәба имузеи аҳәынҭқарратә статус аҭан", — лҳәеит Арсалиаԥҳа.
Акультура аминистр лажәақәа рыла, арҭ амузеиқәа ес-шықәса рыҽдырҭбаарц рылшоит.
"Ҩба-хԥа шықәса аҭахуп арҭ амузеиқәа шьақәгыларазы, амч еиҳа иӷәӷәахарц. Амузеиқәа ирымоуп рхатәы директорцәа, иазԥхьагәаҭоуп амузеи аусзуҩцәа", — азгәалҭеит лара.
Акультура аминистр Ельвира Арсалиаԥҳа Sputnik Аԥсны иалҭаз арадиоинтервиу шәазыӡырҩыр ҟалоит абра
Нестор Лакоба ихьӡ зху амузеи аԥҵан 1982 шықәсазы. Иара еснагь напхгаҩыс даман амузеи аусуараҿы аԥышәа ду змоу Лиудмила Малиаԥҳа.
"Аибашьра ашьҭахь ари амузеи ааха аиуит, аусурагьы аанкылан. Амузеи иатәыз афонд уажәы ишьҭоуп аҳәынҭқарратә музеи аҟны. Абри амузеи аҳәынҭқарразы акырӡа аҵанакуеит. Ажәакала, ирацәоуп аусурақәа", — ацылҵеит акултутра аминистр.
Арсалиаԥҳа илҳәеит, ҭагалан ишымҩаԥгаз амузеи аусзуҩцәа рконференциа. Хықәкыс ирыман Аԥсны иҟоу амузеиқәа зегьы иаку рреестр аиқәыршәара.
"Ақалақьқәеи ақыҭақәеи рыҟны ирацәоуп амузеиқәа. Ирацәоуп дара рахьынтә араионқәа рымчрақәа рахь иахьаҵанакуа. Уи аҟынтә иаҳҭахуп еизгоу ареестр аҟаҵара, амузеи азы азакәан изаҳәо ала. Иҟалалоит ус амузеи аԥҵоуп, аус ауеит, аха астатус шьақәыргылаӡам. Амузеиқәа иаадырԥшуеит аҳәынҭқарра аҭоурых. Уи аҟынтәи аҳәынҭкарратә программа ала иҟаҵатәуп Аԥсны иаҭауаа аԥсшьацәа хымԥада амузеиқәа ирҭаарц", — ҳәа лҳәеит аминистр.
Аҳәынҭқарратә музеиқәа хәба ыҟоуп Аԥсны: аҳәынҭқарратә музеи, Владислав Арӡынба ихьӡ зху "Ахьӡ аԥша" амузеи, Дырмит Гәлиа иҩны-амузеи, Нестор Лакоба иҩны-амузеи, Баграт Шьынқәба ихьӡ зху аҩны-амузеи.
