АҞӘА, хәажәкыра 6 – Sputnik. Аладатәи Афедералтә университет аҟны иазырхиаз атесттә дҵа аԥышәара аҽны ауп ианаартыз, убри азы адҵа здыруаз ыҟан ҳәа аҳәара зынӡагьы ииашаӡам, ҳәа аанацҳауеит Аҟәа иҟоу анаукеи акультуреи рцентр.
"Аурыс бызшәазы атекст аиҳарак ахәшьара арҭон аорфаграфиа аганахь мацарала. Аурыс бызшәаҟны ирыдкыло аԥҟарақәа инарықәыршәаны", ҳәа аҳәоит адырраҭараҟны.
Россотрудничество оумашәа ибаны иаднакылеит аԥсуа ган аԥышәарақәа раан аҭагылазаашьа хылаԥшра аҳҭомызт ҳәа ирҳәаз.
"Алхрақәа раан Аԥсны Аҵара аминистрраҟынтәи Россотрудничество ахаҭарнакрахь инашьҭымызт иарбанызаалак жәалагалак мамзаргьы гәаанагарак. Аԥсны Ахада ихаҭыԥуаҩ Витали Габниа иакәзар, уи аусутә гәыԥ активла аусура дшалахәызгьы, иарбанызаалак жәалагалак ҟаимҵеит аԥышәарақәа рҽазыҟаҵара амҩаԥысшьазы", — ҳәа арбоуп адырраҭара атекст аҟны.
Урыстәылатәи аган инаҵшьны иазгәанаҭоит алхрақәа рҳәаа иҭагӡаны аусеицура хықәкны ишамоу, ишазыхиоу абитуриентцәа ралхра амеханизм аиӷьтәразы аконструктивтә диалог.
