АҞӘА, хәажәкыра 17 – Sputnik, Владимир Бегунов. Аԥсны анаплакыҩцәа рзы акурсқәа аартхоит, Аԥсны Аекономика аминистрра апрограмма "Ауаҩытәиса икапитал ахь аинвестициақәа" аҳәаақәа ирҭагӡаны. Аекономика аминистрра алаҳәара ҟанаҵеит акурсқәа рахь анеиразы арзаҳалқәа шаднакыло ала. Абри атәы ҳкорреспондент изеиҭеиҳәеит Аекономика аминистр ихаҭыԥуаҩ Баҭал Ҭарба.
Иара иажәақәа рыла акурсқәа разыҟаҵара мҩаԥысуеит. Дара аартхоит 2017 шықәса 2-3 акварталқәа раан. Аминистрра асаит аҟны ицәыргоуп ахарҭәааразы анкета. Уи адагьы Атуризми, афинансқәеи, ақыҭанхамҩеи рминистррақәа ирыдҵоуп анаплакыҩцәа акурсқәа шымҩаԥгахо азы адырра рырҭарц. Иазыԥхьагәаҭоуп 60-ҩык рҟынӡа ааԥхьара рыҭара.
"Изҭаху рхыԥхьаӡара еиҳахозар, уигьы ҳахәаԥшып. Иахәҭоуп акандидатцәа 35 шықәса иреиҳамзарц, аус зуа бизнеск рымазарц. Аиҳарак русура иахырхарҭазароуп: ааглыхра, аԥсыӡаарыхра, ақыҭанхамҩа, атуризм", — иҳәеит Ҭарба.
Аминистр ихаҭыԥуаҩ иажәақәа рыла атеориа ашьҭахь имҩаԥгахоит астажировка Аԥснытәи анаплакқәа рҟны, иазыԥхьагәаҭоуп Урыстәылатәи анаплакқәа рахь зҽалызкааз рышьҭра астажировка аҳасабла.
Ҭарба ишиҳәаз ала арҵаҩцәа макьаназ иалкаам. Дара ааԥхьахоит ААУ аҟынтәии Урыстәылантәии.
"Аԥсны азы ари раԥхьатәи ԥышәоуп. Ауснагӡатә аихшьаалақәа иаҳдырбашт апрограмма ырҭбаатәума, мамзаргьы иацҵатәума", ҳәа азгәеиҭеит аминистр ихаҭыԥуаҩ.
Аҵара хәыда-ԥсадахоит. Аԥаразоужьра аҳәынҭқарра имҩаԥнагоит.
