АҞӘА, хәажәкыра 17 – Sputnik, Роберт Џьопуа. XXIV Аԥсны Ачемпионат хацыркхоит хәажәкыра 20 рзы. Абри атәы Sputnik Аԥсны аҟны имҩаԥгаз апресс-конференциаҟны иҳәеит Аԥсны Ашьапылампыл Афедерациа апрезидент Џьума Кәарацхьелиа.
"Хәажәкыра 20 рзы иааҳартуеит ахәмаррақәа. Араионқәа зегьы ркомандақәа алахәхоит Пицундатәи акоманда ада. Зегьы зыдҳәало афинансқәа роуп", — иҳәеит Кәарацхьелиа.
Ахәаша, хәажәкыра 17 рзы ашьапылампыл клуб "Нарҭи" акоманда "Афони" еицыхәмаруеит Аԥсны Ахраҿа хада аиуразы иҳәеит иара.
Аԥсны Ахраҿа хадазы еицыхәмаруа ареспублика Ачемпионат аҟны аԥыжәара змоу, Ахраҿа занашьоу роуп. Ииасыз асезон аан аиааира змаз аҳҭнықалақь акоманда "Нарҭ" ауп. Иара аҩбатәи аҭыԥ аанызкылаз акоманда "Афон" иацыхәмаруеит.
Ахәмарра мҩаԥысуеит асааҭ 16.00 рзы, астадион "Динамо" аҟны.
