АҞӘА, хәажәкыра 24 — Sputnik, Рада Ажьиԥҳа. Аԥсуа ҳǝынҭқарратǝ музеи ашҭаҿы амузеи аетнографиатǝ ҟǝша аусзуҩцәа имҩаԥыргеит Хǝажǝкыра иазку аныҳǝа "Амузеи ашҭа".
"Хǝажǝкыра иазку аныҳǝа аиҿкаара акыр ҵуеит ҳгәы иҭоуижьҭеит. Хықәкыс иҳамоуп аԥсуаа рытрадициақәа аӡыргара, иззымдыруа дырбара, рзеиҭаҳәара. "Амузеи ашҭа" аҟны иӡыргоуп аԥсуа анхара анҵыра аҟны иныҟәыргоз амаҭәахәқәа реиԥш, хәажәкыра иадыргалоз ачысхкқәагьы", — ҳәа лҳәеит амузеи аетнографиа ҟәша аусзуҩ Инга Шамԥҳа.
Аҵарауаҩ, аетнолог Валери Бигәаа иҳәеит, аԥсуаа ажәытә аахыс иазгәарҭоит аԥсуаа рытрадициатә милаҭтә культура иаҵанакуа аныҳәа – хәажәкыра.
"Аԥсуаа ретнографиаҟны цқьа иҭҵаам аныҳәақәа иреиоуп –хәажәкыра. Жәабран мза анынҵәо ихырқәшахоит аиҭарныҳәақәа — Жәабран ныҳәа ала. Хәажәкыра март мза аныҩагыло иақәшәоит, иазгәарҭоит шәахьыла. Уигьы аҵакы ду амоуп", — иҳәеит иара.
Хәажәкыра ааԥынра агәашә азааныртоит, ҳәа иԥхьаӡоит аҵарауаҩ.
"Хәажәкыра — адгьыл ақәаарыхра иакультуп. Хәажәкыразы иҟарҵоит ахәажәқәа, уи иагәыларҵоит арасаҵәы. Џьара ҭаацәарақәак аҟны цыра-цырак ахәажәқәа рымҵарҵоит, даҽа џьара х-цырак. Ахәажә иагәыларҵо аҵәы ганкахьала ицәырԥссаны, ҽангакахьала ихырқәшаны иагәыларҵоит. Убри аҵәы зықәшәаз дымшуп ҳәа иԥхьаӡоуп", — ҳәа азгәеиҭеит Бигәаа.
"Амзуеи ашҭа" аныҳәа иаҭааз ирбарц рылшон аԥсуа адгьыл ақәаарыхразы рхы иадырхәоз амаҭәарқәа, иара убас аџьықәреи зларлагоз – алу, аџьыка зықәдырххоз — аҳаҟьа, ахәыҷы дызгарарҵоз — агара, аԥсуа милаҭтә хәмаргақәа: акьанџьақәеи, ахыци аҳамԥали.
