ГАГРА, хәажәкыра 26 — Sputnik, Саида Жьиԥҳа. Гагра араион алхратә ҭыԥқәа рҟны, 18 сааҭ рзы рыбжьы рҭихьеит 6 801-ҩык, 17 289-ҩык асиа иарбоу алхыҩцәа рахьтә.
Ҩымчыбжь раԥхьа, Аԥсны Жәлар реизара-Апарламент ахь имҩаԥысуаз алхрақәа раан, ауаажәлар еиҳа активла алхратә ҭыԥқәа рахь инеиуан ҳәа азгәарҭеит гәыԥҩык, алхратә комиссиақәа рхаҭарнакцәа.
12-тәи алхратә ҭыԥ хада 3-тәи алхратә ҭыԥ аҟны, 18 сааҭ рҟынӡа сиала иарбоу 1689-ҩык алхыҩцәа рахьтә бжьыҭира инеиз рхыԥхьаӡара 650-ҩык ыҟоуп.
"Хәажәкыра 12 рзы имҩаԥысуаз алхрақәа раан, алхыҩцәа еиҳа активра аадырԥшуан. Иахьа, бжьыҭира иааиуа акырӡа рхыԥхьаӡара еиҵоуп. Иааидкыланы, ҳалхратә ҭыԥ аҟны, аилагарақәа ыҟаӡам, ашьыжь инаркны зегьы маншәаланы имҩаԥысуеит", — иҳәеит 12-тәи алхратә ҭыԥ хада, 3-тәи алхратә ҭыԥ акомиссиа ахантәаҩы ихаҭыԥуаҩ Ахра Бебиа.
