АҞӘА, хәажәкыра 29 — Sputnik, Бадри Есиава. 2017 шықәса анҵәамҭеи 2018 шықәса алагамҭеи рзы атәыла Ахада идҵала аҳәынҭқарратәии амуниципалтәи маҵзурақәа ауааԥсыра еиҳа ирмарианы рыҭаразы еиҿкаахоит Ацентр ҷыда.
"Ацентр аиҳарак иармариараны иҟоуп еиуеиԥшым адокументқәа реизгараан ауаа рус. Ацентр анеиҿкаахалак ашьҭахь еиуеиԥшым аусбарҭақәа рҟны ирҭаху ашәҟәқәа ирышьҭамлакәа, ҭыԥк аҟны урҭ реидкылара рылшо иҟалоит. Асеиԥш амаҵзура "Ҿхышәк амаҵзура" ҳәа иашьҭоуп. Иара убасгьы ԥхьаҟазы иаҳгәиҭоуп иҳәынҭқарратәым амаҵзурақәагьы ауааԥсыра рыҭара", — иҳәеит Аекономика аминистрра азинтә ҟәша аиҳаҩы Саид Гәылариа.
Иара убасгьы иҳәеит асеиԥш аусура ауаҩы иаамҭа шеиҿнакаауа.
"Атәылауаҩ аԥхьа данааиуа иахәҭаны иҟоу адокументқәа реиқәыԥхьаӡа ааигароуп, уи ашьҭахь аҽа знык дааиуеит. Усҟан инапы иадыркуеит иазырхиоу адокументқәа. 80% рҟынӡа амаҵзурақәа абри аҭыԥ аҟны иуоур алшо иҟалоит", — иҳәеит иара.
Ацентр аматериал-техникатә еиқәыршәара макьаназы аус адырулоит. Уажәазы ишьақәырӷәӷәоу Ацентр аофис Ажәанба им. 9 аҟны игылоу ахыбраҿ ишыҟалоу ауп.
