АҞӘА, хәажәкыра 31 – Sputnik, Рада Ажьиԥҳа. Аԥсны аҳәынҭқарратә ҿартә театр аофициалтә саит аусура иалагеит. Абри атәы Sputnik иазеиҭеиҳәеит атеатр адиректор Аслан Енықь.
"Афинанстә уадаҩрақәа иҟоу ирыхьмырԥшыкәа ҳара иалҳаршеит аофициалтә саит аусура аларгара. Асаит аҟны ицәыргахоит атеатр аилазаара рзы адыррақәа, иҟалараны иҟоу аспектакльқәа рӡыргара", — иҳәеит Енықь.
Енықь иажәақәа рыла лассы иалагоит онлаин абилеҭқәа рыҭира, асаит аҭааҩцәа ироуеит алшара рыхҳәаақәеи рҭахрақәеи рааныжьра.
Аҿар ртеатр атеатртә сезон аатит хәажәкыра 9 рзы, Аԥсны жәлар рартистка Софа Агәмааԥҳа лықәыргыламҭа "Ажьақәеи арқьымаҭқәеи" рыла.
Иахьа азырхиара иаҿуп аспектакль ҿыц.
Аԥсны аҳәынҭқарратә ҿартә театр аԥҵан 2014 шықәса рзы. Ара ихәмаруеит Аԥснытәи аҳәынҭқарратә университет афилологиатә факультет актиортә ҟазара аҟәша аушьҭымҭацәа.
