АҞӘА, мшаԥымза 4 — Sputnik. Рауль Ҳаџьымба адашшыларатә шәҟәы изишьҭит Владимир Путин Санкт-Петербург аҭыԥ змаз арыцҳара инадҳәаланы.
Абри атәы аанацҳауеит атәыла Ахада иофициалтә саит.
"Аԥсны гәалсра дула ирыдыркылеит Петербургтәи аметро аҟны иҟалаз аԥжәара инамаданы ауааԥсыра рҭахара. Аԥсны жәлари, хаҭала сареи, гәалсра дула ҳрыдашшылоит иҭахаз рыуацәеи рҭынхацәеи, иара убасгьы Урыстәылатәи Афедерациа ажәларқәа зегьы", ҳәа аҳәоит адашшылараҟны.
Аԥжәара ҟалеит Санкт-Петербургтәи аметро астанциа "Сенная площадь" аҟны. Иҟоу адыррақәа рыла жәаҩык ауааԥсыра ҭахеит, аахақәа роуит ҩеижәижәабаҩык. Арԥжәага авагон иҭан.
Урыстәылатәи Афедерциа Апрезидент Владимир Путин аҳәамҭа ҟааиҵеит аԥжәара амзызқәа макьаназ ишышьақәыргылам, аха атеракт аверсиа егьырҭ аверсиақәа реиԥш аус адулара ишаҿу.
Уажәтәи аамҭазы ашьаус хацыркуп.
