АҞӘА, мшаԥымза 7 – Sputnik, Амра Амҷыԥҳа. Ажәабжь бзиа аныҳәа ақырсианцәа рыдагьы зегьы ирныҳәоуп иҳәеит Аԥсны Аиашахаҵаратә уахәама аиҳабы, аиреи Виссарион (Аԥлиа), Аҟәатәи акафедралтә уахәамаҟны имҩаԥысыз Анцәа иашьапкра ду ашьҭахь.
Абри амш лаша аҽны Аҭыԥҳа Мариа длызнеиит аԥааимбар, иагьлеиҳәеит Иаса Қырса длыхшараны дшыҟаз.
Аиреи Виссарион (Аԥлиа) иҳәеит Аҟәатәи акафедралтә уахәамазы ари аныҳәа иҷыдоу аҟазшьа шамоу.
"Адунеи ақырсианцәа зегьы рзы аҵак ду змоу ныҳәоуп иахьа. Иара убасгьы ари аныҳәа Аҟәатәи ауахәамазы иҷыдоу аҵакы амоуп, избанзар ҳуахәама абри аныҳәоуп изызку. Анцәа иҳәааит ажәабжь бзиа еснагь адунеи иаҭаауа, ҳаԥсуа дгьыл иқәыҩуа", — иҳәеит аиреи Виссарион.
Ажәабжь бзиа Амшаԥи Қьырсаныҳәеи рышьҭахь иреиҳау ныҳәоуп ҳәа иԥхьаӡоуп, ақьырсиан ныҳәа дуқәа жәаҩа ируакуп.
Аныҳәа азгәарҭоит Қьырса жәымз шыбжьоу, Ачгара дуи Амшаԥымза ахԥатәи амчыбжьи ирыбжьакуп.
