АҞӘА, мшаԥымза 10 – Sputnik, Бадраҟ Аҩӡба. XVI жәларбжьаратәи ахәыҷтәы-қәыԥштә шьапылампылтә турнир "Весенний кубок южной столицы" мҩаԥысит Шәача, мшаԥымза 2 – 7 рзы. 2005 шықәса рзы ииз гәдоуҭатәи ашьапылампылтә команда "Риҵа" алахәылацәа актәи аҭыԥ ааныркылеит атурнир аҟны.
Абри атәы Sputnik акорреспондент изааицҳаит акоманда азыҟаҵааҩ Гоча Сулаиа.
Акоманда хә-хәмаррак ирылахәын, зныкгьы иаҵамхеит. Уи адагьы ахәмаррақәа зегьы раан зынзаҵәык ауп рымба ампыл анҭадыршәыз ("Риҵа" — "Коломна", 3:1).
Дара ракәзар иааидкыланы 18 мпыл ҭадыршәит.
"Ҳкоманда рыцыхәмаруан Лазаревск, Шәача, Маиҟәаԥ, Армавир ркомандақәа", — иҳәеит азыҟаҵаҩ.
Аатурнир аҟны иреиӷьу ахәмарыҩцәа ҳәа иалыркааит Рауль Гагәулиа, Никита Қаԥшь, Даниил Ҭаниа.
