АҞӘА, лаҵарамза 5 – Sputnik, Бадраҟ Аҩӡба. Амҳаџьырқәа рыԥшаҳәаҟны, Идырым асолдаҭ ибаҟа аҿаԥхьа имҩаԥысит 1941-1945шш. рзтәи Аџьынџьтәылатә еибашьра Дуӡӡа аиааира амш 72-шықәса ахыҵра иазку апарад арепетициа хада.
"Арепетициа хада иаԥхьанеиуан Аԥсны Атәылахьчара аминистрреи, Урыстәыла Атәылахьчара аминистрреи, Аԥсны иҟоу Урыстәыла Ашәарҭадаратә маҵзура Аусбарҭеи рыррамаҵзурауаа имҩаԥыргоз аҽазыҟаҵарақәа", — иҳәеит Аԥсны Атәылахьчара аминистрра апресс-маҵзура Роланд Џьоџьуа.
1941-1945шш. рзтәи Аџьынџьтәылатә еибашьра Дуӡӡа аиааира амш 72-шықәса ахыҵра иазку апарад лаҵарамза 9 рзы иалахәхоит 300 рҟынӡа аррамаҵзурауаа.
Аныҳәа аҽны имҩаԥысраны иҟоуп акциа "Ԥсра зқәым аполк", аус ауеит иаарту акрыфарҭа, абаҟа аҿаԥхьа иаартхоит асахьаҭыхратә школ аҵаҩцәа рцәыргақәҵа, имҩаԥгахоит аконцерт.
