АҞӘА, лаҵарамза 10 — Sputnik, Амра Амҷԥҳа. Ансамбль "Аԥхьарца" Шәача ақалақь аҿы имҩаԥысуаз VI жәларбжьаратәи афестиваль-конкурс "Аҟазара адунеи еиднакылоит" аҟны Гран-при анашьахеит. Абри атәы ҳзааицҳаит ансамбль анапхгаҩы Даур Ԥарулуа.
Иара иажәақәа рыла афестиваль иалахәын Нхыҵ Кавказ ақалақьқәа рҟынтәи, Волгодонск, Белгород рҟынтәи ансамбльқәа.
"Аԥснытәи "Абаза" актәи аҭыԥ ааннакылеит. Ажиури реилазаара иалан Урыстәылатәи Афедерациа зҽаԥсазтәыз артистцәа, апрофессорцәа. Урҭ ҳара ҳансамбль алахәылацәа рыхә ҳаракны иршьеит", — иҳәеит Ԥарулуа.
Ансамбль "Аԥхьарца" уажәы ҩынтәуп гран-при ранашьахоижьҭеи.
Ансамбль "Аԥхьарца" иазыԥхьагәанаҭоит Гагреи Гәдоуҭеи ақалақьқәа рҟны афольклортә фестивальқәа рылахәхара.
"Уԥсадгьыл аҟны ақәгылара еснагь иҷыдоу аҭакԥхықәра ацуп, угхақәагьы иаразнакы иуҵырбаауеит", — иҳәоит иара.
Ансамбль "Аԥхьарца" арепертуар иалоуп аԥсуа жәлар рмелодиақәа, акәашаратә мелодиақәа.
Ахәыҷтәы ансамбль "Аԥхьарца" Шәачатәи афестиваль аҟны иқәгылан лаҵарамза 8 рзы, Аӡынтәи атеатр ахыбраҿы.
