АҞӘА, лаҵарамза 16 – Sputnik, Роберт Џьопуа. Хәҩык Аԥснытәи ашколқәа роушьҭымҭацәа МГИМО аҭалара иазыхиоуп. Абри атәы радио Sputnik иазааицҳаит Аԥсны Адәныҟатәи аусқәа рминистр ихаҭыԥуаҩ Кан Ҭаниа.
"Амҽышаҽны имҩаԥысит аԥшьбатәи, ахыркәшаратә ԥышәара. Аԥшьбатәи аԥышәараҟынӡа 18-ҩык рҟынтәи 8-ҩык неиит. Англыз бызшәа ҩыратә формала ирҭиуан. Атест уадаҩын. Атест зегьы ахысит, аха ҳара уаанӡатәи аԥышәарақәа реихшьаалақәагьы ҳрыхәаԥшны иалаҳкаауаз 60 балл зауз роуп. Иаанхеит хәҩык", — ҳәа еиҭеиҳәоит Ҭаниа.
Аминистр ихаҭыԥуаҩ иазгәеиҭеит ԥхынгәымзазы арҭ иалкаау ахәҩыкгьы иара уа, аинститут аҟны атестқәа ҩба ирхысроуп.
Аԥышәарақәа ирхысыз абитуриентцәа хәҩык рыхьӡқәа асоциалтә ҳа Facebook аҟны аминистрра адаҟьаҿы иарбоуп.
"МГИМО аҭалара иазыхиоуп: Кәеиза Куҿба, Викториа Перцхьелиаԥҳа, Тхасоу Ҳаразиа, Александр Чкадуа, Ирина Елбакиан", ҳәа арбоуп аминистрра адырраҭараҟны.
Иахьазы МГИМО аҟны аҵара рҵоит 41-ҩык ареспублика ауааԥсыра.
