АҞӘА, лаҵарамза 24 – Sputnik, Бадри Есиава. Лаҵарамза 23 рзы, Афон Ҿыц ауахәамаҟны Аԥсны аиашахаҵаратә дин ныҟәызго дыргәаладыршәеит Иаса Қьырса иҩызцәа, ишьҭрақәлаҩцәа ируаӡәкыз апостол Симон Кантәи.
Аныҳәатә уснагӡатәқәа ирылахәын Аԥсны Ахада Рауль Ҳаџьымба, Аԥыза-министр Беслан Барцыц, Аԥсны Жәлар Реизара адепутатцәа, ауаажәларра, атәыла асасцәа.
Ацқьа Симон Кантәи имш азгәаҭара аԥсуа иашахаҵаратә уахәамаҿ аныҳәа хадақәа ируакуп. Ацқьа апостол Симон Кантәи Аԥсны аиашахаҵара аларҵәара, анцәа иажәа ауаа рҟнынӡа анагара даҿын.
"Ари аныҳәа даара акыр аҵанакуеит Аԥсны ахьынӡанаӡааӡо, аԥсуа жәлар зегьы рзеиԥш адунеи иқәынхо ақьырсианцәа зегьы рзгьы. Симон Кантәи ихьӡ каҳмыршәроуп, избанзар уи анцәа иажәа Аԥсны иааигеит, ауаа ирылаирҵәеит. Уи иахҟьаны иԥсҭазаара далырхит", — азгәеиҭеит Аԥсны Аиашахаҵаратә уахәама аиҳабы аб Виссарион (Аԥлиа).
Симон Кантәи имш азгәаҭара аиашахаҵара иқәныҟәо ауаа зегь рзыҳәа гәырӷьара дууп, лҳәеит арахь иааиз Диана Коӷониаԥҳа. "Сара ари аныҳәа сҽаласырхәуеит, избанзар Симон Кантәи ибзоурала аԥсуа уахәама апостолтә ҳәа азырҳәо иалагеит. Аԥсны аиашахаҵара ныҟәызго зегьы ари амш рыдысныҳәалоит", — лҳәеит лара.
Асеиԥш иҟоу ауснагӡатә рҽаламырхәыкәа изавымсит Афон Ҿыц иаҭаан иҟаз атуристцәагьы.
Ростовнтәи Аԥсны иаҭаан иҟоу Татиана Лозина лҭаацәеи лареи Аԥсны рыԥсы ршьарц рыӡбеит, уи иагьахьымхәит. Аҭыԥ ԥшӡарақәа рыдагьы асеиԥш иҟаз аныҳәа иахьалахәхаз агәахәара ду рнаҭеит.
"Ҳара екскурсиа ҳасабла Афон Ҿыц ҳаҭааит. Аныҳәагьы ҳақәшәеит. Асеиԥш иҟоу аныҳәатә ныҟәара раԥхьаӡа акәны ҳалахәхеит. Анцәа дхазҵо рзы ари аҵакы дуӡӡоуп", — лҳәеит Лозина.
Ацқьа Симон Кантәи Иаса Қьырса иҵаҩцәа 12-ҩык дыруаӡәкуп. Ацқьа Симон Кантәи инықәырԥшны ҳера ҟалаанӡа 55 шықәсазы Афон Ҿыц аҳаԥаҿы аӡиас Ԥсырцха азааигәара анхара далагеит. I ашәышықәсазы Симон дахьынхоз аҳаԥы ааигәара ачымазарақәа зыхәшәтәуаз аӡыхь ыҵыҵуа иалагеит. IV ашәышықәсазы Симон Кантәи анышә дахьамадоу ааигәара ихьӡала ауахәама ргылан.
