АҞӘА, лаҵарамза 25 – Sputnik, Анжелика Бениаԥҳа. Лаҵарамза 27 асааҭ 19:00 рзы Аҟәа, амшын аԥшаҳәаҟны, Аԥсуа ҳәынҭқарратә драматә театр аҿаԥхьа идырбахоит Валериа Адлеиаԥҳа лфиналтә қәгылареи Аԥсны акәашаратәи авокалтәи гәыԥқәа рықәгылареи.
Аинформациатә маҵзуреи арадио Sputnik Аԥсныи рнапхгаҩы Руслан Бганба иазгәеиҭеит, амаҵзура агәахәара шамоу асеиԥш иҟоу ауснагӡатә аиҿкаара иахьалахәу.
"Аԥсны иқәынхо зегьы Валериа лықәгылара иацклаԥшуеит. Зегьы азыԥшуп лара лиааира. Sputnik Аԥсны агәахәара аиуеит атәыла ауааԥсыра рзы апроект афиналтә ныҳәа арбара иахьалахәу", — иҳәеит Бганба.
Аконцерт арбара иацхраауеит Аҟәа ақалақь Ахадара аҿари аспорти рзы Аилак, КВН акоманда "Нарты из Абхазии".
"Ҳара иаҳҭахуп иҳалшо зегьы ҟаҳҵарц Валериа асцена ду аҟны ҳадгылара анырра лоурц. Апроект афинал Валериа лыдагьы, ҳара ҳзгьы аҵакы аманы иҟоуп. Лара афинал аҟынӡа лнеира ареспублика ауаажәлар зегьы агәеизҳара рнаҭоит", — иҳәеит Аԥсны Жәлар Реизара адепутат "Нарты из Абхазии" акоманда адиректор Венори Бебиа.
"Ты супер!" атранслиациа иалагаанӡа, асааҭ 19:00 рзы адрамтеатр аҿаԥхьа еиҿкаахоит аҭыԥантәи аколлективқәа рконцерт. Амш бааԥсхар, ауснагӡатә ииагахоит афилармониахь.
Жәларбжьаратәи ахәыҷтәы вокалтә конкурс "Ты супер!" афинал мҩаԥысраны иҟоуп лаҵарамза 26 рзы, Кремль, лаҵарамза 27 асааҭ 20:00 рзы аконцерт дырбахоит ателехәаԥшралеи, аинформациатә маҵзура Sputnik Аԥсны аҿи.
