АҞӘА, рашәарамза 2 – Sputnik, Бадраҟ Аҩӡба. Аԥсны Аҭагылазаашьа ҷыдақәа рзы аминистр Лев Кәыҵниа радио Sputnik аинтервиу анеиҭоз иҳәеит рашәарамза 2 ауха илеиз ақәаршҩы иахҟьаз ахҟьа-ԥҟьақәа ртәы.
Иара иҳәеит Гәылрыԥшь араион Каштак иахьаҵанакуа аҭыԥқәа рҟны аҩнқәа маҷымкәа аӡы шрыҵалаз.
"Аҵх асааҭ ҩба рҟынӡа АҶА аусзуҩцәа аҭыԥ аҟны ақәаршҩы иҟанаҵаз аԥхасҭа аҭыԥ ақәҵаразы ацхыраара ҟарҵон. Аӡы аҩнқәа ирыҩналеит, ауҭрақәа, амхырҭақәа ирыҵалеит", — иҳәеит иара.
Лев Кәыҵниа иажәақәа рыла аусурақәа иахьагьы ирыцырҵоит. Аҟәа акәзар, амҩадуқәа акыр аӡы шырнызгьы бааԥсырак ҟамлеит, иҳәеит аминистр.
"Анцәа иџьшьаны ақәа ирласны ихкәеит. Ақалақьтә маҵзурақәа зегьы иахәҭаны иҟаз аусурақәа иаарласны имҩаԥыргеит. Аӡгьы леиит", — иҳәеит Кәыҵниа.
Аԥыза-министр хаҭала аусурақәа шцоз хылаԥшра аиҭон ҳәа азгәеиҭеит аминистр. Иара убасгьы Гәылрыԥшь араион аҟны икаҳаз аҵла аамҭак амҩатә ныҟәара ааннакылеит.
