АҞӘА, рашәарамза 5 — Sputnik. Рауль Ҳаџьымба инапы зҵеиҩыз Адҵала Андзор Гоов ихы дақәиҭтәуп Аԥсны Агәабзиарахьчара аминистрс дахьыҟаз аҟынтәи. Абри атәы аанацҳауеит атәыла Ахада иофициалтә саит.
"Хаҭалатәи ирзаҳал инақәыршәаны Андзор Назрун-иԥа Гоов ихы дақәиҭтәуп Аԥсны Агәабзиарахьчара аминистрс дахьыҟаз аҟынтәи. Агәабзиарахьчара аминистрс дҟаҵоуп Ҭамаз Мурман-иԥа Ҵахнакьиа", ҳәа аҳәоит атәыла Ахада Идҵа.
Андзор Гоов 2014 шықәса жьҭаарамза инаркны Аԥсны Агәабзиарахьчара аминистрс дыҟан.
Амедицинатә наукақәа ркандидат, ахирург Ҭамаз Ҵахнакьиа 2011 шықәса мшаԥымзазы аминистр ихаҭыԥуаҩыс дҟаҵан.
2017 шықәса жәабранмзазы Ҵахнакьиа Ареспубликатә хәышәтәырҭа аҳақьым хадас иҟалара инадҳәаланы инапынҵақәа рҟынтәи ихы дақәиҭтәын.
