АҞӘА, рашәарамза 7 – Sputnik, Роберт Џьопуа. Ақыҭанхамҩаҿ ахархәара змоу абиологиатәи ахимиатәи маҭәашьарқәа римпорти рекспорти хылаԥшра анаҭалоит Ақыҭанхамҩа аминистрра.
Ақыҭанхамҩа аминистр ихаҭыԥуаҩ Владимир Дауров иажәақәа рыла, афитосанитартә хырхарҭа змоу амаҭәашьарқәа рҭыжьра, рекспорт, римпорт хылаԥшра анаҭалароуп акомпетенттә орган.
"Иахьатәи аамҭазы усеиԥш хылаԥшрак ыҟоуп ҳәа узҳәом. Аӡәгьы издыруам заҟа аларгало заҟа алырго", — иҳәеит Дауров.
Аминистрцәа реилазаараҟны аиҳабыра рлахәылацәа аамҭалатәи аԥсахрақәа аларгалеит Ақәҵара "Анаркотикатә маҭәашьарқәеи, аԥсихотроптә маҭәашьарқәеи урҭ рпекурсорқәеи рықәгара аԥҟара". Аминистрцәа Реилазаара азинтә ҟәша аиҳабы Лаша Цаава иазгәеиҭеит зыӡбахә ҳәоу ачымазцәа ирырҭо амаҭәашьарқәа шракәу.
