АҞӘА, рашәара 13 – Sputnik, Бадраҟ Аҩӡба. Аҟәатәи аӡиас-ҷҷақәа ԥшьба рӡышьҭрақәа рыцқьахоит акомплекстә план инақәыршәаны, ҳәа Аҟәа ақалақь Ахадара акоммуналтә усбарҭа аиҳабы Дмитри Аҳәба Sputnik акорреспондент изеиҭеиҳәеит.
"Ишыжәдыруеиԥш Москва имҩаԥысит аиҳабырабжьаратә комиссиа аилатәара. Ишьақәырӷәӷәоуп акомплекстә план. Арахь иаҵанакит Аҟәатәи аӡиас-ҷҷақәа ԥшьба рӡышьҭрақәа ррыцқьарагьы. Аусурақәа мҩаԥгахоит Урыстәылатәи афинанстә цхыраара амчала", — иҳәеит иара.
Арахь иаҵанакит аӡиасқәа Басла, Аӡаԥшь, Гарикәара, Маиактәи аӡиа.
"Маиактәи аӡиа иамоуп амшын ахь анеирҭа. Ҳара уигьы арыцқьара ҳгәы иҭоуп. Арҭ аусурақәа мҩаԥнагараны иҟоуп "Аԥсныргылара", — иҳәеит Аҳәба.
Ақәаршҩы ахҟьа-пҟьақәа дрылацәажәо Аҳәба иҳәеит акоммуналтә усбарҭа аусзуҩцәа иахьазы арыцқьаратә усурақәа рымҩаԥгара ишаҿу.
