АҞӘА, рашәарамза 14 – Sputnik, Бадраҟ Аҩӡба. Ричард Чкадуа иажәабжьқәа реизга "Чан" Искандер ипремиа аиуразы ашорт-лист ианылеит. Абри атәы Sputnik акорреспондент изеиҭеиҳәеит аконкурс ажиури ахантәаҩы, ашәҟәыҩҩы Евгени Попов.
"Ҳара даара икылкааны иалаҳкаауан аконкурс ахь инашьҭыз азыҳәақәа. Урҭ Фазиль Искандер иидеиақәа ирзааигәазар акәын. Ашорт-лист ианылаз рахь иаҵанакуеит: Александр Кабаков иажәабжь "Камера хранения", Александр Мелихов ироман "Свидание с Квазимодо", Александр Снегириов ирҿиамҭақәа, иара убас Ричард Чкадуа иажәабжьқәа реизга", — иҳәеит иара.
Ричард Чкадуа ипроза акыр ахә ҳаракны иршьеит аконкурс ажиури алахәылацәа, иҳәеит Евгени Попов.
"Ашорт-лист ахь иаҵанакит апрозатә рҿиамҭақәа быжьба, апоезиатә рҿиамҭақәа хәба, Аслан Галазов икиносценари", — иҳәеит ажиури ахантәаҩы.
Ричард Чкадуа еиԥш Фазиль Искандер ипремиа аиура рҽазыршәон: Игор Хәарцкьиа ("Дом на окраине"), Витали Шариа ("Букет Абхазии"). Аха арҭ аусумҭақәа ашорт-лист ианымлеит.
Фазиль Искандер ихьӡ зху апремиа шьаҭанаркит Урыстәылатәи ПЕН-центр.
Аусумҭақәа рыдкылара хацыркын ԥхынҷкәын 1 2016 шықәса рзы.
