АҞӘА, рашәарамза 16 – Sputnik, Бадраҟ Аҩӡба. Аԥсны Аҭагылазаашьа ҷыдақәа рминистр Лев Кәыҵниа Sputnik иазеиҭеиҳәеит Аҟәа илеиз ақәаршҩы ахҟьа-ԥҟьақәа ртәы. Шьеглов имҩаҿы жәабала аҩнқәа аӡы рыҵалеит иҳәеит аминистр.
"Ҳара уажәы Шьеглов имҩаҿ ҳаҟоуп. Аӡы ара уаанӡагьы ихыҵлон, аха уажәы акыр иҳаракхеит", — иҳәеит иара.
Аминистр иажәақәа рыла АҶА аусзуҩцәа ауаа аҩнқәа рҟынтәи рдәылгара мҩаԥыргон. Иҟан змазара аныжьра зҭахымызгьы.
Аминистр иажәақәа рыла ақәаршҩы леиип ҳәа адырра ыҟамызт. Ақәа ӷәӷәа леиит ашьхарахь, аӡқәа рҩеирагьы уи иадҳәалоуп.
