АҞӘА, рашәара 20 – Sputnik, Роберт Џьопуа. Аҭыԥ аҟны имҩаԥгаз агәаҭарақәа заанаҵтәи рылкаақәа рыла Калмыков имҩаҟны иҟаз аԥжәара харантә имҩаԥган. Абри атәы Sputnik иазаарыцҳаит Апрокуратура хада апресс-маҵзураҟынтәи.
Апрокуратура хада адыррақәа рыла ахәра иоуит Руслан Аргәын, 1974 шықәса рзы ииз.
"Ареспубликатә хәышәтәырҭаҟны Аргәын аоперациа изун, иарма шьапы хҵәоуп, иарӷьа шьапы ԥҵәоуп. Иҭагылазаашьа уадаҩуп. Аинтенсивтә терапиа апалатаҿы дыҟоуп", ҳәа азгәанаҭоит аусбарҭа.
Ахҭыс инадҳәаланы ашьаусҭҵаара амҩаԥгара иаҿуп.
Рашәарамза 19 2017 шықәса, асааҭ 21:15 рзы Аҟәа ақалақь, Калмыков имҩа аҩны №3аҟны аԥжәара ҟалеит. Арԥжәага аҩны №2 аганахь ала ацоколь аҟны ишьҭан.
