Академик Зураб Џьапуа иажәақәа рыла "Аславиантә традициатә культуреи иахьатәи адунеии" захьӡыз XXII Жәларбжьаратәи аҭҵаарадырратә конференциаҿы иалацәажәеит афольклорҭҵаараҿы иҟоу апроблемақәа ртәы.
"Ари традициатә конференциоуп, есышықәса атематика аҽаԥсахуеит. Сынтәатәи аконференциа иалкааны иазкын — адунеиаҿтәи афольклор ахаҿсахьақәа. Аконференциаҿы ҳалацәажәеит афольклорҭҵаараҿы иҟоу апроблемақәа ртәы, Аԥсныи Урыстәылеи мацара акәымкәа, адунеи зегьы рҿы. Аконференциа аҳәаақәа ирҭыгӡаны ҳаиԥылеит Урыстәылатәи аҭҵаарадыррақәа ракадемиа апрезиденти сареи. Ҳалацәажәеит иаҳзеиԥшу апроектқәа", — иҳәеит Џьапуа.
Иара убас аконференциа иалахәын афольклорҭҵааҩцәа Наала Барцыцԥҳа, Мадонна Ԥлиаԥҳа, Есма Ҭодуаԥҳа, аҵарауаа Цира Габниаԥҳа, Елисо Сангәлиаԥҳа.
