Апарламент аҟны иаԥҵоуп анаркотикқәа реикәыршара ахылаԥшраз акомиссиа

© Fotolia / CreativaАпарламент аҟны иаԥҵоуп анаркотикқәа реикәыршара ахылаԥшраз акомиссиа
Апарламент аҟны иаԥҵоуп анаркотикқәа реикәыршара ахылаԥшраз акомиссиа - Sputnik Аҧсны
Анапаҵаҩра
НовостиTelegram
Аԥсны Жәлар реизара аилатәараҿы иалацәажәон анаркотикатәи апсихотроптә маҭәашьарқәеи изакәанымкәа реикәыршара азҵаара.

АҞӘА, рашәарамза 22 – Sputnik, Роберт Џьопуа. Аԥсны Жәлар реизараҿы иалацәажәон анаркотикатәи апсихотроптә маҭәашьарқәеи изакәанымкәа реикәыршара азҵаара. Иагьышьаҭаркын анаркотикқәа реикәыршара ахылаԥшраз акомиссиа.

"Акомиссиа иалахәхоит хәҩык-фҩык адепутатцәа. Уажәазы уахь иалагалоуп: Инал Ҭарба, Венори Бебиа, Асҭамыр Аршба, Каха Пертаиа, Иури Ҳагәышь, нас сара. Акомиссиа иалалар алшоит изҭаху зегьы. Акомиссиа аусурахь иадҳаԥхьалар алшоит аҟазауаа, аекспертцәа", — иҳәеит акомиссиа напхгара азҭо Дмитри Дбар.

Адепутат Лаша Ашәба ажәалагала ҟаиҵеит акомиссиа далахәхарц Аҩныҵҟатәи аусқәа уаанӡатәи рминистр Рауль Лолуа.

Апарламент асессиа амҩаԥысраан иахәаԥшын иара убасгьы аҽа ҩ-комиссиак: Аԥсны Апарламенти Урыстәыла Афедерациа Ахеилаки, Аԥсны Апарламенти Урыстәыла Аҳәынҭқарратә думеи русеицуразы — раԥҵара азҵаара.

Акомиссиақәа рыҩбагь депутатцәак еицрылахәхар алшоит, ҳәа агәаанагара иҟаз иаҿагылазгьы ҟалеит. Убас адепутат Баҭал Табаӷәуа иҳәеит акомиссиақәа хаз-хазы адепутатцәа рылахәзароуп ҳәа.

"Иалшоит депутатк акомиссиақәа рыҩбагь дырхагылазар. Уи сақәшаҳаҭуп. Аха аамҭакала аӡәы рыҩ-комиссиакгьы данрылахәу иашоуп ҳәа исыԥхьаӡом", — иҳәоит иара.

Валери Кәарҷиа иҳәоит хыԥхьаӡара рацәала адепутатцәа Москваҟа рцара-раара абиуџьет азы ихьанҭахоит ҳәа.

Аилатәараан адепутатцәа Натали Смыри Баҭал Аибеи Амилаҭтә банктә хеилак иаларгалеит, Каха Пертаиа аӡбаҩцәа рквалификациатә коллегиа иаларҵеит, Лашу Ашәба – ареспублика адвокатцәа рквалификациатә комиссиа.

Ажәабжьқәа зегьы
0