АҞӘА, рашәара 28 – Sputnik, Бадраҟ Аҩӡба. Аҩаша, рашәарамза 27 рзы Адыга музыка аконцерт мҩаԥысит Аҟәа, Самсон Ҷанба ихьӡ зху Аԥсуа драматә театр аҿаԥхьа.
Адраматә театр аҿаԥхьа еизаз ирыдгалан итрадициатәу адыгатә кәашара "Джэгу", иара убасгьы инагӡан адыга милаҭ ашәақәа.
"Ҳара Краснодартәи атәылаҿацә аҟынтәи ҳааиит. Ҳара уаажәларратә еиҿкаароуп, ҳмилаҭ аиқәырхара ҳхықәкуп. Ҳапрограмма азырхоуп акультура-массатә уснагӡатәқәа рымҩаԥгара", ҳәа Sputnik акорреспондент изеиҭалҳәеит "Адыга культура Ацентр " ахантәаҩы Сафиет Шамова. Ацентр ахаҭарнакцәа Ҭырқәтәыла иаҭаахьеит, уа инхо адыга-черқьес диаспора ахаҭарнакцәа рзы еиуеиԥшым ауснагӡатәқәа мҩаԥыргахьеит.
"Ҳара Аԥсны раԥхьаӡа акәны ҳаҟоуп. Ҳара еишьцәоу жәларуп. Иаку адацқәа ҳамоуп", — лҳәеит лара.
Сафиет Шамова илҳәеит Аԥсни дареи ркультуратә еимадарақәа ԥхьаҟагьы аҿиара шрыҭахо, ишазыԥхьагәаҭо амассатә уснагӡатәқәа.
