АҞӘА, ԥхынгәы 5– Sputnik, Роберт Џьопуа. Аконституциатә ӡбарҭа аилазаара макьаназ еиҿкаам, избанзар Аԥсны Аконституциатә ӡбарҭа аӡбаҩыс Аоппозициатә мчқәа Рыблоки атәыла анапхгареи реиқәшаҳаҭрала зкандидатура ықәыргылаз Сафарбеи Мканба икандидатура Апарламент адепутатцәа ишьақәыдмырӷәӷәеит.
Мканба икандидатуразы рыбжьы рҭиит 17-ҩык, иҿагылан рыбжьы рҭиит 13-ҩык.
"Ҳара аҽазныкгьы агәра аагеит аӡбаҩцәа рыпрофессионалтә ҩаӡарала акәымкәа аполитикатә ҵаҵӷәала ишалырхуа", — иҳәеит Апарламент адепутат Баҭал Табагәуа.
Мканба икандидатура аганахь ала Апарламент агха ҟанаҵеит, ҳәа ишьеит адепутат Александр Анқәаб.
Уаанӡа Аконституциатә ӡбарҭа аӡбаҩцәас иалырххьан Рауль Пантиа, Лиудмилу Хоџьашьвили, Нури Ҭаниа, Диана Ԥлиаԥҳа.
Изаамҭанытәиу аилатәараҟны, ԥхынгәы 5 рзы, Аԥсны Апарламент Аҟәатәи, Иреиҳаӡоу, Арбитражтә ӡбарҭақәа рыӡбаҩцәа хҩык: Марат Аҩӡба, Олесиа Ҭарԥҳа, Омиани Логәуа алнахит.
