АҞӘА, ԥхынгәы 5– Sputnik. Аахыҵ Уаԥстәыла Ахада Анатоли Бибилов иофициалтә визит аан Аԥсны Ахада Рауль Ҳаџьымбеи иареи реиԥылара мҩаԥысуеит, анапы рыҵаҩхоит ҩ-ганктәи аиқәшаҳаҭрақәа. Авизит мҩаԥгахоит ԥхынгәы 7-8 рзы. Абри атәы аанацҳауеит атәыла Ахада иофициалтә саит.
Адырраҭараҿы иарбоуп ԥхынгәы 7 рзы атәылақәа рхадацәа аиҿцәажәара шымҩаԥырго, ирылацәажәараны ишыҟоу ҩ-ганктәи аусеицура азҵаарақәа, атәылақәа ԥхьаҟатәи реизыҟазаашьақәа.
Аделегациа Аԥсны аҳәынҭқарратә ҳәааҟны ирԥылоит. Амҩан Гагра иаҭаауеит. Аҳҭнықалақь аҟны асасцәа Ахьӡ-аԥша апарк ахь инеиуеит ашәҭшьыҵәрақәа рышьҭаҵаразы. Иара убасгьы иаҭаараны иҟоуп Ешыра ақыҭан Владислав Арӡынба ибаҟа.
Бибилов зхадараҟны дыҟоу аделегациа иалахәуп: Адәныҟатәи аусқәа рминистр Дмитри Медоев, Акультура аминистр Жанна Зассеева, Апрокурор хада Урузмаг Джагаев, КГБ ахантәаҩы Виктор Шаргаев, Ауаажәларратә палата ахантәаҩы Анатоли Джиджоев.
