АҞӘА, ԥхынгәы 7 – Sputnik, Амра Амҷԥҳа. Анеиааиратә ҳаирплан атәара иахҟьаны хҩык ауаа, апилоти ҩыџьа апассаџьырцәеи, Гагратәи ацентртә раионтә хәышәтәырҭахь инаргеит ҳәа Sputnik акорреспондент илеиҳәеит Аԥсны Аҭагылазаашьа ҷыдақәа рминистр Лев Кәыҵниа.
Иара иажәақәа рыла аҳаирплан артәараан апилот аԥсҟы измырманшәалеит, аҳаирплан агәы иқәҳәазаны итәеит.
"Ааха роуит ҩыџьа Москватәи атуристцәа, ани аԥеи", — иҳәеит Кәыҵниа.
АҶА аусзуҩцәа ааха зауз ауааԥсыра аҳаирплан иҭыргеит.
"Иахьынӡаздыруа ала ахатәы неиааиратә ҳаирплан ҩышықәса Пицунда аус ауеит. Атуристцәа ақәдыртәоит", — иҳәеит аминистр. Ацхыраара ласы Гагратәи араионтә хәышәтәырҭахь инанагаз актәи ацхыраара рыҭоуп. Уажәы атуристцәа Шәачаҟа риагаразы ареаномобиль амҩа иқәлахьеит".
Апилот иакәзар, ихы кыдҟьеит, аха ишьҭаҵара аҭахны иҟам.
