АҞӘА, ԥхынгәы 11– Sputnik. Ԥшьҩык асабардақәа зҿаз ауаа аԥҭека "Лекфарм" иақәлеит ԥхынгәы 9 асааҭ 22:30 рзы ҳәа аанацҳауеит Аԥсны Апрокуратура хада аофициалтә саит.
Автомашьына "Хендай-Солярис" ала ацәгьоура аҭыԥ аҟынтәи ибналаз ацәгьоуцәа ахатәтәра ахьчара аҟәша аусзуҩцәа иреихсит.
Ацәгьоуцәа Ӡиӡариа имҩаҟны иҟоу аԥҭека "Лекфарм" иақәлеит. Амч рхы иархәаны 260 нызқь мааҭ ргеит.
Амилициа аусзуҩ Карапет Дилениан ахәра иоуит.
Асааҭ 23:50 рзы Лечкоԥтәи аԥсыжырҭа ааигәара аоперативникцәа ирыԥшааит иблыз автомобиль "Хендай-Солярис".
Абри аганахь ала Аҟәа ақалақь апрокуратура ашьаусҭҵаара хацнаркит.
