Аԥсуа драматә театр 86-тәи асезон: аихшьаалақәа

© Sputnik / Томас Тхайцук86-тәи атеатртә сезон ахыркәшара иазкны Sputnik амультимедиатә пресс-центр аҟны имҩаԥысит апресс-конференциа
86-тәи атеатртә сезон ахыркәшара иазкны Sputnik амультимедиатә пресс-центр аҟны имҩаԥысит апресс-конференциа - Sputnik Аҧсны
Анапаҵаҩра
Аԥсуа ҳәынҭқарратә драматә театр 86-тәи атеатртә сезон ахыркәшара иазкны Sputnik амультимедиатә пресс-центр аҟны имҩаԥысит апресс-конференциа.

АҞӘА, ԥхынгәы 11— Sputnik, Амра Амҷԥҳа. Аԥсуа ҳәынҭқарратә драматә театр 86-тәи атеатртә сезон ахыркәшара иазкны Sputnik амультимедиатә пресс-центр аҟны имҩаԥысит апресс-конференциа. 86-тәи атеатртә сезон аан имҩаԥган апремbерақәа ԥшьба (Валери Ақаҩба иқәыргыламҭа аспектакль "Пешком", Мадина Аргәынԥҳа лықәыргыламҭақәа "Дом Бернарды Альбеи" "Снежная королевеи", Алхас Шамба иқәыргыламҭа "Махаджиры") иҳәеит апресс-конференциаҟны атеатр адиректор Адгәыр Џьниа.

Атеатр асахьаркыратә хеилак алахәыла Роман Асабуа иажәақәа рыла, акрааҵуан атеатр зыхьӡ аху Самсон Ҷанба иҩымҭак ақәыргылара рҭахны иҟазижьҭеи.

Апресс-конференциаҟны иазгәаҭан ахәыҷқәа ирызку ақәыргыламҭақәа еснагь аинтерес рыҵаны ишыҟоу.

Агәыҳалалратә фонд "Ашана" хылаԥшра знаҭо ахәыҷқәеи, ашкол-интернат аҵаҩцәеи, арепатриантцәа рхәыҷқәеи рзы атеатр аҟны лассы-лассы имҩаԥыргоит аспектакльқәа дырбара. Ахәыҷқәа рзы абилеҭқәа рыхәԥса 100 мааҭ роуп иҟоу.

"Уи ҳара изыҟаҳҵо ахәыҷқәа атеатр, акультура абзиабара дыркразоуп, — иҳәоит Адгәыр Џьениа. – Ҳара зегьы Аԥсны ҳанхоит, ибзианы иаадыруеит иҟоу ауадаҩрақәа".

Актиор, арежиссиор Алхас Шамба иазгәеиҭеит аҭааҩцәа шырацәо.

"Ахәаԥшҩы атеатр дашьцылоит. Аспектакльқәа ракәзар, еиԥымҟьарыда иқәҳаргылоит", — иҳәеит иара.

Атеатр "адесерт" ҳәа азырҳәеит аспектакль "Дом Бернарды Альба", Гарсиа Лорка ипиеса ала иқәыргылаз.

Аспектакль Бернарда Альба лыҩны - Sputnik Аҧсны
"Бернарда Альба лыҩны" аԥсуа сценаҟны апремиера мҩаԥысит

"Мызкахьы знык иқәҳаргылоит, ахәаԥшҩы уии дазыԥшуп. Аспектакль акыр иуадаҩуп адекорациақәа рыла аума аԥсихологиатә структура алоума", — лҳәоит Мадина Аргәынԥҳа.

Аԥсуа драматә театр аҿы асезон мҩаԥысуеит цәыббрамза инаркны ԥхынгәымзанӡа. Апресс-конференциаҟны 87-тәи асезон иалацәажәо иазгәарҭеит, ишазыԥхьагәаҭо аспектакльқәа ԥшьба.

"Арҿиаратә хәылԥазқәа рхацыркра ҳгәы иҭоуп. Иара убасгьы иахьа иҳалагылам ҳартистцәа дуқәа ргәалашәаратә хәылԥазқәа мҩаԥаагараны ҳаҟоуп", — лҳәеит Аргәынԥҳа.

Иара убас иазыԥхьагәаҭоуп аԥсуа литературазы ашколтә программа аинсценировкақәа рымҩаԥгара. Убри аганахь ала уажәы аҵара аминистрреи атеатри аилацәажәарақәа мҩаԥыргоит.

Иаарласны Самсон Ҷанба ихьӡ зху Аԥсуа драматә театр асаит, аԥсуа бызшәа, аурыс бызшәа, англыз бызшәа рыла аусура иалагараны иҟоуп.

Актиор Даур Арухаа иҳәеит, Аԥсуа театр амузеи аадыртраны ишыҟоу.

Атеатр аҭаара астатистика далацәажәо Адгәыр Џьниа абасеиԥш иҟоу адыррақәа ааигеит: 2014 шықәса рзы 800-ҩык инареиҳаны аҭааҩцәа ыҟан, 2015 шықәса рзы –6 нызқьҩык рҟынӡа, 2016 шықәса рзы 11 нызқь инареиҳаны. Иара убри аан 2014 шықәса рзы атеатр алагалақәа 170 нызқь мааҭ ыҟазар, 86-тәи асезон аан ҩ-миллионки бжаки рҟынӡа инаӡеит.

Ажәабжьқәа зегьы
0