АҞӘА, ԥхынгәы 13 – Sputnik. Москва, Урыстәылатәи атуристцәа Аԥсны иахьрықәлаз даара агәҭынчымра рызнарҵысуеит. Иазыԥшуп ацәгьоуцәа аанкыланы ирыхәҭоу иақәдыршәап ҳәа. Абри азы аҳәамҭа ҟанаҵеит Урыстәыла Адәныҟатәи аусқәа рминистрра, ҳәа аанацҳауеит РИА Новости.
Гәдоуҭа араион апрокуратура ихацнаркит ашьаусҭҵаара. Урыстәылатәи атуристцәа ирықәлеит ԥхынгәы 11 рзы Гәдоуҭа араион Приморское ақыҭан.
Ацәгьоура ҟалеит амшын аԥшаҳәаҿы. Макьаназ зхаҭара шьақәыргылам ҩыџьа ауаа асабардақәа рҿаҵаны, абџьари аҳәызбеи рхархәарала атуристцәа ирықәлеит. Ақәылараан Кабанов Андреи Николаи-иԥа 1984 шықәса рзы ииз игәышԥахьы ҩынтә аҳәызба иларҵеит. Кабанов иоуз ахәрақәа ирыхҟьаны иԥсҭазаара далҵит.
Ацәгьоуцәа ирӷьычит иара убасгьы Кабанова Наталиеи уи ҩыџьа лхәыҷқәа – 2006 шықәсеи 2015 шықәсеи рзы иизи иара убасгьы Чижикова Наталиеи уи лхәыҷқәа ҩыџьеи, 2002 шықәсеи 2007 шықәсеи рзы иизи. Аоперативтә уснагӡатәқәа ирылыршаны ирӷьычыз ауаа рхы иақәиҭтәын.
"Урыстәыла ААР иҟалаз ахҭыс агәҭынчымра азнарҵысуеит, иагьазыԥшуп азинхьчаратә органқәа иаарласны ацәгьоуцәа рыԥшаап ҳәа. Аԥсны иҟоу Урыстәыла Ацҳаражәҳәарҭа ашьаусҭҵаара иашьклаԥшуеит, ааха заузгьы ишрылшо ала ирыцхраауеит", ҳәа аҳәоит Урыстәыла ААР аинформациеи акьыԥхьи рзы Адепартамент ахҳәааҟны.
